काठमाडौँ– रेलवे कम्पनीको महाप्रबन्धक पदबाट राजीनामा दिएपछि गुरु भट्टराईले आफूले प्रयोग गरेको सरकारी गाडी मन्त्रालयलाई बुझाएका छन् ।

आज दिउँसो उनले राजीनामा दिएपछि आफूले प्रयोग गर्दै आएको बा २ झ ३०४५ नम्बरको गाडी मन्त्रालयलाई बुझाएर बा १० च ३१५ नम्बरको निजी सवारीमा मन्त्रालयबाट बाहिरिएका हुन् ।

आचरण र अनियमितताको आरोप लगाउँदै अघिल्लो मंगलबार सरकारले स्पष्टीकरण सोधेपछि भट्टराईले गत सोमबार आफूले गरेका कामको विवरण सार्वजनिक गर्दै राजनीतिक पूर्वाग्रह साँधिएको भन्दै प्रष्टीकरण नदिने बताएका थिए ।

प्रष्टीकरण सोधेर सरकारले हटाउने तयारी गरिरहँदा भट्टराईले त्यसअघि नै आज भौतिक पूर्वाधार तथा यातायात मन्त्रालयमा राजीनामा बुझाएका हुन् ।

भट्टराईलाई केपी ओली नेतृत्वको सरकारले २०७७ जेठ २८ गते नियुक्त गरेको थियो । उनले असार ४ बाट कार्यभार सम्हालेका थिए ।