काठमाडौँ- नेकपा (एमाले)को विवाद समाधानका लागि कार्यदलको बैठक बिहानदेखि अर्थमन्त्रालयमा जारी छ । जारी बैठकमा आजै सहमति गर्ने गरी छलफल भइरहेको कार्यदल सदस्यहरुले बताएका छन् ।

विवाद समाधानका लागि दिनभर कार्यदलसदस्यहरु जुटे पनि अझै निष्कर्षमा पुग्न सकेका छैनन् ।

कार्यदलमा रहेका ओली पक्षका उपप्रधानमन्त्री विष्णु पौडेलले विवाद समाधानका लागि पहल जारी रहेको बताए ।

विवाद समाधान कार्यदलका संयोजक सुवास नेम्वाङले आजै दुवै पक्षबीच हस्ताक्षर हुने गरी छलफल भइरहेको बताएका छन्।

‘विवाद टुंग्याउन भनेर हामी लाग्यालाग्यै छौं, बिहान ८ बजेदेखि हामी एउटै कोठामा छौं,’ बैठकबाट केही समयका लागि बाहिरिएका नेम्वाङले भने, ‘आजै हस्ताक्षर गरेर युरो कप हेर्न जान्छौँ।’

यसअघि नेम्वाङले हिजोको बैठकपछि आजै सुखद् समाचार सुन्न पाइने बताएका थिए ।

कार्यदल बैठक चलिरहेका बेला नेपाल पक्षका नेता घनश्याम भुसाल पनि बाहिरएका थिए ।

उनले कार्यदलमा भइरहेको छलफलका विषयवस्तुबारे नेता नेपालसँग परामर्श गरेर फर्किएका थिए । उनले कार्यदलमा हिजोअस्तिभन्दा खासै केही पनि प्रगति नभएको बताएका थिए।