काठमाडौँ– नेपाली कांग्रेसले क्रियाशील सदस्यता नवीकरण र वितरणको अवधि बढाउने विषयमा छलफल शुरु गरेको छ ।

केन्द्रीय समिति बैठकको पूर्वसन्ध्यामा बसेको कांग्रेस पदाधिकारी र पूर्वपदाधिकारी बैठकमा क्रियाशील सदस्यता नवीकरण र वितरणको अवधि बढाउने विषयमा कांग्रेसले छलफल गरेको हो ।

पार्टी कार्यालय सानेपामा पदाधिकारी र पूर्वपदाधिकारी बैठकमा धेरै जिल्लामा क्रियाशील सदस्यता नवीकरण र वितरण नसकिएकाले यसको अवधि बढाउने बिषयमा छलफल भएको हो ।

हेरौँ भिडियो

यसअघि कांग्रसले क्रियाशील सदस्यता नवीकरण र वितरणको अवधि चैत मसान्तसम्म कायम गर्ने निर्णय गरेको थियो । तर थप गरिएको समयमा पनि उक्त काम सम्पन्न नभएकाले यसलाई थप गर्ने विषयमा बैठकमा छलफल भएको प्रवक्ता विश्वप्रकाश शर्माले जानकारी दिए ।

महाधिवेशनको कार्यतालिकालाई असर नपर्ने गरि सदस्यता वितरण र नवीकरणको अवधि बढ्न सक्ने उनले बताए । पदाधिकारीको प्रस्ताव सोमबार बस्ने पार्टीको केन्द्रीय समितिको बैठकमा लगिने उनले बताए ।

कांग्रेसको नेतृत्वमा नयाँ सरकार गठनका लागि अन्य दलहसंग छलफल भएकाले माओवादी र जसपाले पार्टीभित्र छलफल गरेपछि पुनः उनीहरुसँग छलफल गरिने जानकारी प्रवक्ता शर्माले दिए ।

आफ्नै नेतृत्वमा सरकार गठनका लागि यसअघि कांग्रेस माओवादी र जसपासँग सयुक्त छलफल गरेको थियो । आइतबारको पदाधिकारी र पूर्वपदाधिकारी बैठकमा सभापति शेरबहादुर देउवा र वरिष्ठ नेता रामचन्द्र पौडेल भने सहभागी भएका थिएनन् ।