काठमाडौँ- नेकपा माओवादी केन्द्रको भ्रातृसंगठन वाईसीएल नेपालले देशको स्वाधीनता, सार्वभौमसत्ता र संविधानलाई बन्धक बनाएर एमसीसी लगायत कुनै पनि अनुदान स्वीकार गर्न नहुने जनाएको छ ।

प्रथम पूर्ण बैठकको निर्णय सार्वजनिक गर्न शुक्रबार काठमाडौँमा आयोजित पत्रकार सम्मेलनमा वाईसीएलले एमसीसी लगायतका कुनैपनि सहयोग अनुदानहरु देशको स्वाधिनता, सार्वभौमसत्ता र संविधानलाई बन्धक राखेर स्वीकार गर्न नसकिने जनाएको हो ।

नेपालको संविधानसँग बाझिएका एमसीसीका बुँदाहरु नसच्चाई पारित नगर्न पनि वाईसीएलले सरकारलाई चूनौती दिएको छ । बैठकले भारतसँगका सम्पूर्ण सीमा विवाद तुरुन्त समाधान गर्न सरकारसँग माग गरेको वाईसीएलका संयोजक सुमन देवकोटाले बताए ।

उनले बन्द रहेका राष्ट्रिय उद्योग तथा प्रतिष्ठानहरु तुरुन्त सञ्चालन गरी युवा रोजगार सिर्जना गर्न पनि सरकारसँग माग गरे । सम्पूर्ण उमेर पुगेका युवा तथा विद्यार्थीहरूका लागि कोभिडविरुद्धको खोपको व्यवस्था गर्न पनि सरकारको ध्यानाकर्षण गराइएको संयोजक देवकोटाले जनाए ।

संगठनले कोभिड महामारकाबीच सम्बन्धित स्वास्थ्य सामग्री खरिद प्रकरणमा मुछिएकाहरुको छानविन गरी दोषीमाथि कारबाही गर्न ढिलाई नगर्न पनि माग गरेको छ ।