काठमाडौँ– नेपाली काँग्रेसका संस्थापन इतरका अधिकांश जिल्ला सभापतिहरुले तोकिएको समयमा नै महाधिवेशन हुन नसके विशेष महाधिवेशनमा जानुपर्ने जनाएका छन् ।

दुई दिनसम्म काठमाडौंमा चलेको भेलापछि मंगलबार वरिष्ठ नेता रामचन्द्र पाडैलपक्ष नेताहरुसँग छलफल गर्दै काँग्रेसको वैधानिकतामाथि संकट रहेको भन्दै वैधानिकताको संकट टार्न विशेष महाधिवेशनमा जानुपर्ने निष्कर्ष निकालिएको काँग्रेस नुवाकोटका सभापति जगदीश्वर नरसिंह केसीले जानकारी दिए ।

उनले अहिले देखिएको क्रियाशील सदस्यता विवादलाई विधि र विधानअनुसार समाधान गर्नुपर्ने धारणा राखे । तोकिएको समयमा नै महाधिवेशन हुन नसके १३ औँ महाधिवेशन प्रतिनिधिबाट विशेष महाधिवेशन गरौँ भन्ने रहेको उनले बताए ।

क्रियाशील सदस्यता विवादबारे पनि पार्टी केन्द्रीय समितिको बैठकको निर्णयअनुसार विवाद भएका ठाउँमा प्रक्रिया पुर्‍याएर क्रियाशील सदस्यता दिने र १३ औं महाधिवेशनको क्रियाशील सदस्यबाट अहिले अधिवेशन गर्दा समस्या समाधान हुन्छ भन्ने आफूहरुको ठहर रहेको उनले बताए ।

उनीहरुले जनतालाई महशुस हुनेगरी कांग्रेस नेतृत्वको सरकारले काम गर्नुपर्ने बताए । सभापतिहरुको भेलाको निष्कर्ष बुधबार सार्वजनिक गरिने केसीले बताए ।