काठमाडौं– अभिनेता कर्मालाई दर्शकले फटाहा फणिन्द्रेको भूमिकामा हेर्न पाउने भएका छन् । अरुण खड्काको निर्माण तथा निर्देशनमा बन्ने फिल्म ‘फटाहा फणिन्द्रे’मा कर्मा शीर्ष भूमिकाका लागि फाइनल भएका हुन् ।

फिल्ममा कर्मासँगै अभिनेत्री छुल्ठिम डी गुरुङ र रोहित रुम्बा पनि अनुबन्धित भएका छन् । फिल्मका लागि अभिनेत्री सुष्मा कार्की यसअघि नै फाइनल भइसकेकी थिइन् ।

श्रीराम बालाजी फिल्मस् र अरुण फिल्म प्रोडक्सनको संयुक्त ब्यानरमा निर्माण हुन लागेको फिल्मको प्रस्तुतकर्ता सुनिल मानन्धर रहेका छन् ।

विक्रम सिंह गुरुङ निर्माता र नेत्र विष्ट कार्यकारी निर्माता रहेको फिल्ममा रोशन श्रेष्ठको द्वन्द्व, विपिन मल्लको सम्पादन, इश्वरलाला सिंकेमनको छायांकन, उत्तम केसीको कथा तथा हिमाल उप्रेती, सुशील पोखरेल र अरुण खड्काको पट्कथा तथा संबाद रहनेछ । निर्माता अरुणले यसअघि फिल्म ‘तिम्रो लागि’, ‘पाठशाला’ निर्माण गरिसकेका छन् । चैतको पहिलो साताबाट छायांकन शुरु हुने फिल्म कमेडीसँगै अपराधको कथा प्रस्तुत गर्नेछ ।