काठमाडौँ– नेपालमा कोरोना भाइरस सक्रिय संक्रमितको सख्या ८८ हजार नाघेको छ ।

पछिल्लो केही दिन यता निको हुने भन्दा नयाँ संक्रमित थपिनेको संख्या बढेसँगै सक्रिय संक्रमितको संख्या ८८ हजार १६० पुगेको स्वास्थ्य तथा जनसंख्या मन्त्रालयले जानकारी दिएको हो ।

मन्त्रालयको आइतबारको तथ्यांक अनुसार २६ जिल्लामा ५०० भन्दा बढी सक्रिय संक्रमित रहेका छन् भने १९ जिल्लामा २०० भन्दा बढी सक्रिय संक्रमित रहेका छन् । मन्त्रालयको तथ्यांक हेर्दा देशभर रहेका सक्रिय संक्रमितको आधीजसो सक्रिय संक्रमित काठमाडौँ उपत्यकामा रहेका छन् ।

मन्त्रालयका अनुसार हाल काठमाडौंमा २७ हजार ६६०, भक्तपुरमा ३ हजार ९१२ र ललितपुरमा ६ हजार १० गरी उपत्यकामा मात्र ३७ हजार ५८२ जना सक्रिय संक्रमित रहेका छन्।

काठमाडौंमा बढी सक्रिय संक्रमित भएकै कारण शुक्रराज ट्रपिकल तथा सरुवा रोग अस्पताल, टेकुलगायत धेरै अस्पतालहरुमा वेडको अभाव सृजना भइसकेको छ भने वेडको अभावमा मानिसहरु अक्सिजन सिलिन्डर बोकेर अस्पतालको बाहिर समेत बसिरहेको संक्रामक रोग विशेषज्ञ डा. शेर बहादुर पुनले जानकारी दिए।