ताइपेइ– ताइवानले मत्सु टापु आसपासका क्षेत्रमा चीनले बालुवा उत्खनन् गरी अतिक्रमण गरेको आरोप लगाएको छ ।

चीनले अवैधरुपमा बालुवा उत्खनन् गरेर सो क्षेत्रमा अतिक्रमण थालेपछि त्यहाँका स्थानीयहरुको आफूहरुको जिविकोपार्जनमा समेत समस्या निम्तिएको जनाएका हुन् ।

अवैध बालुवा उत्खननकै कारण ड्रेजिङका जहाजहरू तथा स्थानीय माछा मार्न प्रयोग गरिएको डुंगा सञ्चालनमा समस्या निम्तिएको स्थानीयको भनाइ छ ।

डीडब्ल्यूको जोइस लीको एक भिडियो रिपोर्टमा चीनले स्थानीयका माछा मार्ने डुंगाहरुलाई समेत नियन्त्रणमा लिइएको जनाइएको छ ।

छ वर्षदेखि सो क्षेत्रमा माछा मार्दै आएका चिह जुई(यिनले भने,  ‘यस क्षेत्रमा पहिले माछा मारेर एक लाख ताइवान डलर कमाइ हुने गरेकोमा अहिले यो घटेर १० हजारमा ताइवान डलरमा झरेको छ । १० प्रतिशत मात्र बाँकी छ ।’

चीनले सो क्षेत्रमा अतिक्रमण गर्न थालेपछि त्यहाँका माछाहरु समेत अन्यत्र भागेको उनले दाबी गरे ।

यस प्रकारको चिनियाँ अतिक्रमणले मत्सु वरपर तटीय क्षेत्रमा क्षति निम्त्याएको डीडब्ल्यू न्यूजले जनाएको छ ।