मुम्बई– फिल्म ‘सन्दीप और पिंकी फरार’को नयाँ ट्रेलर सार्वजनिक भएको छ । ट्रेलर सार्वजनिक हुनासाथ सामाजिक सञ्जालमा भाइरल भइरहेको छ ।

फिल्मका निर्देशक दिवाकर बनर्जी हुन् । फिल्ममा अभिनेत्री परिणीति चोपडाले सन्दीप कौर र अभिनेता अर्जुन कपूरले पिंकी दहियाको भूमिकामा अभिनय गरेका छन् ।

जीन्यूजमा प्रकाशित समाचार अनुसार ट्रेलरमा रोमाञ्च र सस्पेन्स दुवै देखाइएको छ । ट्रेलरको सुरुवात परिणीतिबाट हुन्छ, जो एक ट्याक्सी ड्राइभर देखिने अर्जुनसँग सहयोग माग्छिन् ।

परिणीतिलाई प्रहरीले खोजिरहेका हुन्छन् । त्यहीकारण अर्जुनले उनलाई त्यहाँबाट भगाउन सहयोग गर्छन् । उनीहरु भागेर एक वृद्ध दम्पत्तिको घर पुग्छन् । तर प्रहरीहरु उनीहरु भएकै ठाउँमा खोज्दै आइपुग्छ ।

त्यसपछि उनीहरु प्रहरीबाट बच्न नेपाल आउछन् । ट्रेलरको अन्तिम दृश्यमा दुवैबीच झगडा भएको देखाइएको छ । फिल्म मार्च १९ मा रिलिज हुँदैछ ।