काठमाडौँ– बंगलादेशमा एक तेस्रो लिङ्गीले पहिलोपटक समाचार वाचकको रुपमा टेलिभिजनमा प्रवेश पाएकी छन् ।

तश्नुभा अनान शिशिरले बंगलादेशको बोइशाखी टेलिभिजनमा समाचार वाचकको रुपमा प्रवेश पाएकी हुन् ।

टेलिभिजनमा समाचार वाचकको रुपमा प्रवेश पाएकी उनले पहिलो समाचार प्रशारणपछि हर्षले आँशुसमेत झारिन् ।

उनले सोमबार पहिलोपटक समाचार वाचन गरेकी हुन् ।

‘म भित्र निक्कै हड्बडाएकी थिएँ, तर, जब बुलेटिन सकियो मैले आफूमा आत्मविश्वास बलियो भएको महसुस गरेँ । ’ उनले भनिन् ।

‘साढे दुई महिना जतिको अवधिमा जब मलाई टेलिभिजनबाट अडिसनका लागि बोलाइयो ।’ उनले भनिन्, ‘त्यसबेला उहाँहरुले ममा कुनै समस्या भेट्नु भएन । मेरो शब्द उच्चारणलगायत सबै कुरा राम्रो भएपछि टेलिभिजनले मलाई कामका लागि प्रस्ताव गरेको हो ।’

बंगलादेशमा करिब १५ लाख तेस्रो लिङ्ग (ट्रान्सजेन्डर) व्यक्ति रहेको अनुमान गरिएको छ ।

बंगलादेश सरकारले सन् २०१३ मा तेस्रो लिङ्गीलाई कानुनी रुपमा मान्यता दिएको थियो । यस्तै, सन् २०१८ मा तेस्रो लिङ्गीलाई मतदान गर्ने अधिकार प्रदान गरिएको थियो । एएफपी