मुम्बई–यशराज प्रोडक्सनको स्पाई ड्रामा फिल्म ‘पठान’को छायांकन सुरु भइसकेको छ । फिल्मका लागि अभिनेता शाहरुख खानसँग सलमान खान आफ्नो हिस्साको सुटिङ सुरु गर्दैछन् ।

बलिउड हंगामामा प्रकाशित समाचारअनुसार फिल्ममा सलमानको प्रवेश केवल २० मिनेटका लागि भए पनि त्यो निर्णायक हुनेछ । २० मिनेटमा सलमानका कैयौं एक्सन दृश्य देख्न सकिने बताइएको छ ।

फिल्ममा सलमानको प्रवेश फिल्म ‘एक था टाइगर’ र ‘टाइगर जिन्दा हे’ शैलीमा हुनेछ । ‘निर्माता आदित्य चोपडा फिल्ममा सलमानलाई टाइगर शैलीमा सही रुपमा प्रयोग गर्दैछन् । फिल्ममा सलमानको प्रवेश हुनासाथ थिएटरमा दर्शकले ताली र हुटिङले स्वागत गर्नेछन् ।’ फिल्म निकट स्रोतले भनेको छ ।

रुसमा छायांकन हुने एक्सन दृश्यमा सलमानको प्रवेश दुश्मन एजेन्टबाट शाहरुखलाई बचाउनका लागि हुनेछ । कतिले यो दृश्य क्लाइमेक्स हुने भने पनि फिल्म युनिटले त्यसलाई अस्वीकार गरेको छ ।

फिल्मको क्लाइमेक्समा शाहरुख, जोन अब्राहम र अभिनेत्री दीपिका पादुकोणबीचको द्वन्द्व रहनेछ । क्लाइमेक्स दुबईको बुर्ज खलीफाको टुप्पोमा खिचिनेछ । फिल्म जनवरी २०२२ मा रिलिज हुने चर्चा छ ।