मुम्बई(एजेन्सी)– बलिउडका कलाकारहरु पछिल्लो समयमा फिल्ममा भन्दा टेलिभिजन शोको होस्टका रुपमा काम गर्न आकर्षित हुन थालेका छन् । त्यहीकारण उनीहरुको कमाई पनि फिल्मको भन्दा बढी हुने गरेको छ । यसमा सलमान खान, अमिताभ बच्चन, शाहरुख खान र आमिर जस्ता स्टारको नाम अग्रपंक्तिमा आउने गरेको छ ।

पछिल्लो तथ्यांक अनुसार होस्टको कमाईको मामलामा सलमान र अमिताभले शाहरुखलाई पछाडि छोडेका छन् । अभिनेता सलमान वार्षिक रुपमा टेलिभिजन रियालिटी शो ‘बिग बोस’ होस्ट गर्दै आएका छन् । हालका दिनमा उनी ‘बिग बोस सिजन १४’को होस्ट गरिरहेका छन् । यो शोको होस्ट गर्नका लागि उनले प्रतिभाग १४ करोड पारिुश्रमिक लिएका छन् ।

अर्का अभिनेता अमिताभले आफ्नो चर्चित शो ‘कौन बनेगा करोडपति’को होस्ट गर्नका लागि महंगो पारिश्रमिक बुझ्ने गरेका छन् । अमिताभले यो सबै शोको होस्ट गर्नका लागि १ सय ८० करोड पारिश्रमिक लिएका छन् । उनले कैयौं वर्षदेखि यो शो होस्ट गरिरहेका छन् ।

अभिनेता शाहरुखले पनि कुनै समयमा आफ्नो करियर टेलिभिजनबाट नै सुरुवात गरेका थिए । उनले ‘कौन बनेगा करोडपति’को तेस्रो संस्करण र टेलिभिजन शो ‘क्या आप पाँचवी पास से तेज है ?’ जस्तो शो होस्ट गरेका छन् । सन् २०११ मा उनले कलर्स च्यानलमा शो ‘जोरका झटका’ पनि होस्ट गरेका थिए । समाचार अनुसार यो शोका लागि उनले करिब ४५ करोड पारश्रमिक बुझेका थिए ।