मुम्बई(एजेन्सी)–बलिउड अभिनेता राजीव कपुरको मंगलबार ५८ वर्षको हृदयघातका कारण निधन भएपछि उनको पिता राज कपूरसँगको सम्बन्धबारे नयाँ कुरा सार्वजनिक भएको छ । फिल्म ‘राम तेरी गंगा मैली’का अभिनेता राजीवको यही फिल्मका कारण पिता राज कपुरसँग सम्बन्ध बिग्रिएको लेखक मधु जैनले आफ्नो पुस्तक ‘कपूरनामा’मा उल्लेख गरेका छन् ।

पुस्तकका अनुसार राजीवले सन् १९८३ मा रिलिज फिल्म ‘एक जान है हम’बाट बलिउडमा डेब्यू गरेका थिए । फिल्म रिलिज भए पनि उनको अभिनय करियरको रफ्तार अगाडि बढ्न सकेको थिएन । त्यहीकारण पिता राज कपूरले त्यसको दुई वर्षपछि फिल्म ‘राम तेरी गंगा मैली’बाट राजीवलाई पुनः प्रमुख अभिनेताका रुपमा अभिनय गराए । फिल्म सुपरहिट भएपछि यसको श्रेय राजीवको सट्टा फिल्मकी अभिनेत्री मन्दाकिनीले पाइन् । फिल्म चर्चित भएपछि राजीव पिता राज कपुरसँग असन्तुष्ट बने । त्यहीकारण बाबुछोराबीचको सम्बन्धमा खटपट शुरु भयो ।

यो फिल्म रिलिज पछि राज कपूर र मन्दाकिनीको मात्र चर्चा पायो । फिल्म हिट भए पनि राजीवले कुनै फाइदा लिन सकेनन् । यही फिल्मका कारण मन्दाकिनी रातारात स्टार भइन्, तर राजीवले करियरलाई अगाडि बढाउन सकेनन् । उनले यसको सबै दोष पिता राज कपूरमाथि नै लगाए ।

फिल्म ‘राम तेरी गंगा मैली’ पछि राज कपूरले राजीवलाई लिएर कुनै फिल्म बनाएनन् । त्यहीकारण राजीव पिता राजसँग रिसाएका थिए । राजीवले ‘लवर ब्वाई’, ‘हम तो चले परदेस’, ‘अंगारे’, ‘शुक्रिया’ जस्ता फिल्ममा अभिनय गरे पनि दाजु ऋषि कपुरको जस्तो पहिचान बनाउन सकेनन् । राजीव पितासँग यति साह्रो रिसाएका थिए कि राजको निधनपछिको अन्तिम संस्कारमा उनी उपस्थित भएनन् ।