काठमाडौँ- काठमाडौं उपत्यकामा पछिल्लो २४ घण्टामा १९४ जनामा कोरोना भाइरसको संक्रमण पुष्टि भएको छ ।

देशभर थपिएका ३६२ संक्रमितमध्ये १९४ जना काठमाडौं उपत्यकाका मात्रै रहेको स्वास्थ्य तथा जनसंख्या मन्त्रालयले जनाएको हो।

मन्त्रालयका अनुसार काठमाडौंमा १ सय ५३, भक्तपुरमा १८ र ललितपुरमा २३ जना संक्रमित थपिएका हुन ।

मन्त्रालयको तथ्यांक अनुसार हालसम्म काठमाडौँ उपत्यकामा कुल संक्रमितको संख्या ९८ हजार ६ सय पुगेको छ। जसमध्ये ९५ हजार ८८८ जना उपचारपछि निको भएका छन् भने ४ सय ७९ जनाको मृत्यु भएको छ।

काठमाडौंमा हाल २ हजार २३३ जना सक्रिय संक्रमित छन्।

यसैगरी भक्तपुरमा हालसम्म कोरोना संक्रमितको संख्या ९ हजार ३० पुगेको छ । जसमा १ सय १० जनाको मृत्यु भएको छ भने ८ हजार ७८७ जना निको भएका छन । हाल भक्तपुरमा १ सय ३३ सक्रिय संक्रमित रहेका छन् ।

यस्तै, ललितपुरमा कुल संक्रमितको संख्या १५ हजार ५२८ पुगेको छ । जसमा १५ हजार १०५ जना निको भएका छन् भने १५१ को मृत्यु भएको छ। ललितपुरमा हाल २७२ जना सक्रिय संक्रमित रहेको मन्त्रालयले जनाएको छ।