काठमाडौँ– प्रहरीले चोरीमा संलग्न एक समूहका पाँच जनालाई पक्राउ गरेको छ। चोरीमा संलग्न कुखुरे भनि चिनिने राजेश लामिछाने समूहका पाँच जनालाई पक्राउ गरेको हो ।

बालाजु, महाराजगंज क्षेत्रलाई आधार बनाएर काठमाडौं उपत्यकाका विभिन्न स्थानहरुमा दिउँसै चोरी गरेको आरोपमा महानगरीय प्रहरी वृत्त,महाराजगञ्‍जको टोलीले उनीहरुलाई पक्राउ गरेको हो।

पक्राउ पर्नेमा बालाजुका २५ बर्षीय राजेश लामिछाने ‘कुखुरे’, नुवाकोटका २५ वर्षीय भिम तामाङ ,काठमाण्डौ चन्द्रागिरीका २३ वर्षीय रितेश लामा, धादिङका २७६ वर्षीय बिलाष खतिवडा र धादिङकै २८ वर्षीय नवराज सदाशंकर रहेका छन्।

प्रहरीले उनीहरुको चार थान मोबाइल, एक थान एलइडी टिभी, सुनका गरहगना ३ तोला ४० लाल बरामद गरेको जनाएको छ।

घरमा कोही नभएको मौका पारेर उनीहरुले दिउँसै चोरी गर्दै आएको प्रहरी अनुसन्धानबाट खुलेको छ । पक्राउ परेकालाई आवश्यक कारबाहीका लागि महानगरीय प्रहरी वृत महाराजगञ्ज पठाइएको छ।