काठमाडौँ– न्युजिल्यान्ड टी- २० विश्वकप क्रिकेटको सेमिफाइनलमा पुगेको छ ।

आइतबार अफगानिस्तानलाई ८ विकेटले पराजित गर्दै न्युजिल्यान्ड तेस्रो पटक सेमिफाइनलमा स्थान बनाएको हो । यसअघि न्युनिल्यान्ड २००७ र २०१६ मा सेमिफाइनलमा पुगेको थियो ।

न्युजिल्यान्डले १ सय २५ रनको सामान्य विजयी लक्ष्य १८.१ ओभरमा २ विकेट गुमाउँदै पूरा गर्यो । न्युजिल्यान्डका कप्तान केन विलियम्सन ४० रन तथा डेभन कन्वे ३६ रनमा अविजित रहे ।

ओपनर डर्याल मिचेललाई स्पिनर मुजिब उर रहमानले चौथो ओभरको पहिलो बलमा मोहम्मद शाहजादबाट १७ रनमा क्याच आउट गराएका थिए । नवौं ओभरको पाँचौं बलमा राशिद खानले ओपनर मार्टिन गुप्टिललाई २८ रनमा बोल्ड आउट गरे ।

त्यसअघि शेख जायद स्टेडियम आबूधाबीमा टस जितेर पहिला ब्याटिङ थालेको अफगानिस्तानले निर्धारित २० ओभरमा ८ विकेट गुमाउँदै १ सय २४ रन बनाएको थियो । अफगानिस्तानका मध्यक्रमका ब्याटर नाजिबउल्लाह जद्रानले सर्वाधिक ७३ रनको इनिङ खेले पनि टोलीलाई जिताउन सकेनन् ।

न्युजिल्यान्डका तीव्र गतिका बलर ट्रेन्ट बोल्टले ३ विकेट लिँदा टिम साउथीले २ तथा एडम मिल्ने, ईश सोधी र जेम्स निशमले एक/एक विकेट लिए ।