काठमाडौँ– नेपाल कम्युनिस्ट पार्टी (नेकपा) दाहाल-नेपाल समूहका अध्यक्ष माधवकुमार नेपालले अहिलेको लडाइँ न्याय , संविधान र लोकतन्त्र रक्षाको लागि भएको बताएका छन ।

आइतबार असंवैधानिक संसद बिघटनका सन्दर्भमा ट्रेड युनियनको भूमिका विषयक अन्तरक्रियामा अध्यक्ष नेपालले अहिलेको लडाइँ कुर्सिको लागि नभएर न्याय, संविधान र लोकतन्त्र रक्षाको लागि भएको बताएका हुन ।

उनले अहिले केपी ओली मार्क्सवाद छाडेर अवसरवादतिर लागेको आरोप लगाए ।

ओलीले मदन भन्डारीको नाम बेचेर स्वार्थ लिइरहको समेत उनको तर्क थियो । ओलीले आफू र प्रचण्डलाई सत्तामा जाने भर्‍याङमात्र बनाएको उनले बताए ।

पार्टीभित्र अल्पमतमा परेपछि आफ्नो पद जोगाउनका लागि ओलीले संसद विघटन गरेको बताए । ओलीको कदमलाई जनताले पनि साथ नदिने भन्दै त्यसको ज्वलन्त उदाहरण दरवारमार्ग आमसभा रहेको प्रष्ट्याए ।

प्रतिगमनकारी कदमविरुद्ध अहिले आफूहरू आन्दोलनमा रहेको भन्दै उनले यसलाई परास्त गरेरै छाड्ने जिकिर गरे ।

अध्यक्ष नेपालले संसद विघटनको विषयमा संविधान अनुसार न्यायोचित फैसला गर्ने विश्वास व्यक्त गरे ।

कार्यक्रममा नेकपाका नेता घनश्याम भुसालले लोकतन्त्र स्थापित गर्नको लागि सबैभन्दा धेरै योगदान आफूहरुको नै रहेको बताए ।

हेरौँ भिडियो