मोरङ- मुख्यमन्त्री शेरधन राईविरूद्ध अविश्वास प्रस्ताव दर्ता भएपछि प्रदेश १ सभा बैठक आज बस्दैछ ।

नेकपा विभाजनपछिको विवादले प्रदेश १ सरकार संकटमा छ । दाहाल-नेपाल समूहले आजको बैठकमा मुख्यमन्त्री राईविरूद्धको अविश्वासको प्रस्ताव टेबल हुनुपर्ने दबाब दिएको छ ।

दुई समूहको विवादकै कारण गत माघ ७ मा करिब ३ मिनेट  बैठक बसेर स्थगित गरिएको थियो ।

दिउँसो २ बजे डाकिएको बैठकअघि कार्यसूची तयार गर्नका लागि सभामुख प्रदीपकुमार भण्डारीले ११ बजे कार्यव्यवस्था परामर्श समितिको बैठक बोलाएका छन् ।

ओली समूहले कारबाही गरिएका १६ जना प्रदेशसभा सदस्यलाई प्रदेशसभा भवनमा प्रवेश नै गर्न दिन नहुने अडान लिदै आएको छ । यदि कारबाही गरिएको समूहले बैठकमा प्रवेश पाए सभाको कामकारबाही नै अगाडि बढाउने नदिने ओली समूहको तयारी छ ।

कारवाही गरिएका सदस्य बैठकमा उपस्थित भए सत्ता पक्षका सांसदले उठेर नियमापत्त गर्ने नेकपा प्रदेश- १ का प्रमुख सचेतक बुद्धिकुमार राजभण्डारी बताए ।

दाहाल-नेपाल समूहका प्रदेशसभा सदस्य जीवन घिमिरेले भने माघ ७ मा नै सबै प्रदेशसभा सदस्य बैठकमा सहभागी भइसकेकाले कारबाही गरिएको भन्ने विषय नै अन्त्य भइसकेको बताउँछन् ।

कारवाहीको विषय झिकेर बखेडा झिक्न नमिल्ने घिमिरेले बताए ।

गत पुस १२ गते मुख्यमन्त्री राईविरुद्ध नेकपाको दाहाल–नेपाल समूहका ३७ सांसदले अविश्वासको प्रस्ताव दर्ता गराएका थिए । अविश्वासको प्रस्तावमा हस्ताक्षर गरेकामध्ये पाँच जनाले भने  हस्ताक्षर फिर्ता लिइसकेका छन् ।

पुस ५ मा प्रतिनिधिसभा विघटनपछि नेकपाले नेतृत्व गरेका प्रदेश सरकार पनि संकटमा परेका छन् । दाहाल-नेपाल समूहको बहुमत रहेका प्रदेशसभामा मुख्यमन्त्रीविरूद्ध अविश्वासको प्रस्ताव दर्ता भएका छन् । बागमती प्रदेशमा पनि मुख्यमन्त्री डोरमणि पौडेलविरूद्ध अविश्वासको प्रस्ताव दर्ता भएको छ ।