काठमाडौँ– नेकपा (एमाले) विवाद समाधानका लागि गठित कार्यदलको आज भएको बैठक सहमति नजुटाई सकिएको छ ।

सिंहदरबारमा भएको बैठकमा सहमतिका लागि विभिन्न विकल्पमा छलफल भएको नेताहरूले बताएका छन् ।

बैठकमा सहमतिका लागि अघि सारिएका विभिन्न विकल्पमाथि छलफल भएको र छलफल सकारात्मक भएको नेताहरूको भनाइ छ ।

बैठकपछि कार्यदल सदस्य गोकर्ण बिष्टले विवाद समाधनका लागि विभिन्न विकल्पमाथि छलफल भएको तर कुनै सहमति नभएको जानकारी दिए । उनले विभिन्न कोणबाट विमति भएका विषयमा छलफल भएको बताए । सहमति हुनेगरी बुधबार पुन: बैठक हुने बिष्टले बताए ।

कार्यदल सदस्य भीम रावलले विभिन्न समयमा एमालेभित्र भएका घटनाका विषयमा छलफल भएको जानकारी दिए । एमाले भित्र देखिएका समस्या समाधानका लागि पनि छलफल भएको उनको भनाइ छ । बुधबार पनि बैठक बसेर समस्या समाधानका लागि आएका धारणाहरुका आधारमा अघि बढ्ने उनले बताए ।

सोमबार पनि कार्यदलबीच छलफल भएको थियो । पार्टीभित्रको विवाद समाधानका लागि अध्यक्ष केपी शर्मा ओली पक्षबाट ५ र वरिष्ठ नेता माधवकुमार नेपाल पक्षबाट ५ गरी १० सदस्यीय कार्यदल बनाइएको थियो ।

कार्यदलमा ओली पक्षबाट संसदीय दलका उपनेता सुवास नेम्वाङ, उपमहासचिव विष्णु पौडेल, स्थायी कमिटी सदस्यहरू प्रदीपकुमार ज्ञवाली, शङ्कर पोखरेल र विष्णु रिमाल छन् ।

नेपाल पक्षबाट उपाध्यक्ष भीम रावल, उपमहासचिव घनश्याम भुसाल, सचिव गोकर्ण विष्ट, स्थायी कमिटी सदस्यहरू सुरेन्द्र पाण्डे र रघुजी पन्त छन् ।