मुम्बई–भारतमा कोरोना महामारीको बढ्दो त्रासबीच सलमान खानको फिल्म ‘राधे–योर मस्ट वान्टेड भाइ’ मे १३ बाट थिएटर र डिजिटल प्लेटफर्ममा रिलिज हुँदैछ ।

दैनिक जागरणका अनुसार फिल्मका निर्माताहरुले फिल्मबाट हुने कमाईको एक हिस्सा कोरोना भाइरस महामारीविरुद्ध लड्नका लागि सहयोग गर्ने घोषणा गरेका छन् । कमाईको रकम अत्यावश्यक स्वास्थ्य सामाग्री खरिदमा खर्च गरिनेछ ।

यसका लागि उनीहरुले गिभ इन इण्डिया नामको एनजीओसँग सहकार्य गरेका छन् । उनीहरुले संस्थामार्फत आर्थिक सहयोगको पनि आव्हान गरेका छन् ।

फिल्म ‘राधे–योर मस्ट वान्टेड भाइ’ सलमान खान फिल्मस् र जी इन्टरटेनमेन्ट इन्टरप्राइजेज मिलेर निर्माण गरेको हो ।

फिल्म थिएटरसँगै जीप्लेक्स, जी५ र डीटीएच प्लेटफर्म पे पर भ्यूमा उपलब्ध हुनेछ । टिकट विक्री र विभिन्न प्लेटफर्ममा हुने कमाईलाई हेल्थकेयर सिस्टमलाई सपोर्ट गर्न हस्तान्तरण गरिनेछ ।

प्रभु देवा निर्देशित फिल्ममा सलमानसँगै दिशा पाटनी, रणदीप हुड्डा, ज्याकी श्राफको अभिनय छ ।