काठमाडौँ–  कोरोना भाइरस संक्रमितसँग बढी शुल्क लिएको गुनासोपछि जिल्ला प्रशासन कार्यालय काठमाडौँले दुई वटा निजी अस्पतालसँग स्पष्टीकरण सोधेको छ ।

प्रमुख जिल्ला अधिकारी कालीप्रसाद पराजुलीका अनुसार ह्याम्स अस्पताल र काठमाडौं मेडिकल कलेज(केएमसी) अस्पतालसँग स्पष्टीकरण सोधिएको हो ।

प्रमुख जिल्ला अधिकारी पराजुलीका अनुसार औषधि उपचार गराउँदा बढी शुल्क लिएको भन्ने गुनासो आएपछि त्यसैको आधारमा के कसो हो भनेर स्पष्ट पार्न  भनिएको छ । यदि ती अस्पतालले चर्को शुल्क लिएको प्रमाणीत भएका कानून अनुसार कारवाही हुने पराजुलीले बताए ।

ती अस्पतालले जारी गरेको मूल्य सूची सामाजिक सञ्जालमा सार्वजनिक भएपछि चौतर्फी आलोचना भएको थियो । स्वास्थ्य तथा जनसंख्या मन्त्रालयले पनि बुधबार तोकिएको उपचार शुल्कभन्दा बढी लिए कडा कारबाही गर्ने चेतावनी दिएको छ ।