एजेन्सी- हलिउड टेलिभिजन स्टार किम कार्दसियनको घरमा पाँच वर्ष अघि ७० करोड बराबरको चोरी भएको थियो । सन् २०१६ मा किमसँगै पेरिसको गन प्वाइन्टमा एक समूहले लुटपाट मच्चाएको थियो ।

यो घटनापछि किमले प्रहरीमा निवेदन दिएकी थिइन् । पाँच वर्ष पछि यो घटनामा संलग्न एक आरोपीले यही घटनामा आधारित रहेर पुस्तक तयार पारेका छन् ।

६७ वर्षका युनिस अब्बासले आफ्नो पुस्तक ‘आइ किडनेप्ड किम कार्दशियन’ मा किमको घर चोरी गर्दाको घटनाक्रमलाई प्रस्तुत गरेका हुन् ।

अब्बासले आफूले त्यो समयमा किमलाई नचिन्ने गरेको बताए । सोहीकारण आफू यो लुटपाटमा संलग्न भएको खुलाएका छन् । ‘म जब किमको घर भित्र छिरें, त्यहाँ पुग्दा यो घर पक्कै पनि कुनै ठूलो स्टारको हो जस्तो लाग्यो । म यति धेरै धनी महिलाको घरमा चोरी गर्न जाँदैछौं भन्ने मलाई थाहा थिएन,’ अब्बासले भनेका छन्, ‘चोरी गर्दा मैले किमलाई खाटमा बाँधेर चोर्ने काम गरेको थिएँ ।’

अब्बासका अनुसार यो घटना भइरहँदा किम र उनको निजी सहायकले पटक पटक ९११ मा फोन गर्ने प्रयास गरेका थिए । तर उनीहरु पेरिसमा भएकाले त्यो नम्बरको केही अर्थ थिएन ।

‘किमले हामी कसैलाई मार्न नभई चोर्नमात्र आएको थाहा पाएपछि उनले हाम्रो सबै कुरा मानिन् । हामीले निकै छिटो चोर्ने काम गरेका थियौं ।

भित्र पसेर बाहिर निस्कँदा सम्म करिब ७ मिनेटमा सबै काम गरिसकेका थियौं । हामीलाई कसैले रोक्न खोजेनन्, त्यहीकारण पनि सजिलो भएको थियो’, उनले भनेका छन् ।

युनिस ती १२ व्यक्तिमध्ये एक हुन्, जो अपहरण मुद्दामा पक्राउ परेका थिए । उनले किम यति लोकप्रियता बारे पहिले थाहा पाएको भए उनको घरमा चोरी नगर्ने दाबी गरेका छन् । उनका अनुसार उनको त्यो ‘ग्राण्ड ड्याड रोबर्स’ समूहमा ६० देखि ७२ वर्षका वृद्ध आबद्ध थिए ।