काठमाडौँ– नेकपा एमालेको माधवकुमार नेपाल पक्षको केन्द्रीय कमिटी बैठक अहिले जारी छ ।

बुद्धनगरस्थित क्वालिटी ब्यांक्वेटमा जारी बैठकमा पार्टी विभाजनको संघारमा पुगेका बेलाको यो बैठकलाई महत्वका साथ हेरिएको छ ।

जारी केन्द्रीय कमिटी बैठकका एजेन्डा आजै बसेको स्थायी कमिटी बैठकले तय गरेका थिए ।

आजको स्थायी कमिटी बैठकले केन्द्रीय कमिटीका एजेन्डा तय गरेको बताए पनि बैठकका निर्णय भने सार्वजनिक गरिएको छैन् ।

केन्द्रीय कमिटीमा पार्टीको एकता वा विभाजनबारे केन्द्रीय सदस्यहरूको राय लिने कार्यतालिका छ ।

बुधबारका लागि तय भएको बैठक केन्द्रीय सदस्यहरु उपत्यका आइनपुगेकाले आजलाई सारिएको थियो।

पार्टी अध्यक्ष केपी ओली समूहले भने नेपाल समूहको बैठकलाई अनधिकृत बताउँदै त्यसमा सहभागी नहुन अनुरोध गरेको छ।

पार्टी एकताका सन्दर्भमा अध्यक्ष केपी ओली र नेता नेपालका आआफ्नै अडानका कारण एमाले सहमतिको बिन्दुमा पुग्न सकेको छैन।

दोस्रो पुस्ताका नेताहरूले सहमतिको प्रयासलाई जारी राखेका छन्। तर शीर्ष नेताहरू लचकदार नबन्दा उनीहरू हैरान भइसकेका छन्।

आफ्नै समूहका नेताहरूको एमाले एकतालाई जोड दिनुपर्ने र सरकारमा सहभागी हुनुपर्ने दुईथरी धारणाको चेपमा पर्दा नेता नेपाल अनिर्णयको बन्दी बनिरहेका छन्।

आजको बैठकमा एमाले एकता प्रयास र सरकारमा सहभागिताबारे छलफल भइरहेको जनाइएको छ।