काठमाडौँ– नवनियुक्त उपप्रधानमन्त्री तथा शहरी विकास मन्त्री राजेन्द्र महतोले पद तथा गोपनियताको शपथ खाएको आधा घण्टा पनि नबित्दै दिएको अभिव्यक्तिलाई लिएर एमाले नेता वामदेव गौतमले आलोचना गरेका छन् ।

जनता समाजवादी पार्टीको महन्थ ठाकुर पक्ष महतोकै नेतृत्वमा शुक्रबार सरकारमा सहभागी भएको हो । सरकारमा गएका महतोले शपथ ग्रहण गरेको केही समयपछि दिएको अभिव्यक्तिका कारण विवादमा तानिएका हुन् ।

उनले बहुल राष्ट्रका लागि मुक्ति आन्दोलन गर्न आफूहरू सरकारमा समावेश भएको विवादास्पद अभिव्यक्ति दिएका थिए । उनको अभिव्यक्तिलाई लिएर तीव्र आलोचना भइरहेको छ ।

यसैक्रममा एमाले नेता गौतमले यो विषयमा प्रधानमन्त्री केपी शर्मा ओलीले अनभिज्ञता प्रकट गरेकोमा आफू आश्चार्य चकित भएको बताएका हुन् । शनिबार फेसबुकमा लामो स्टाटस लेख्दै गौतमले भनेका छन्, ‘राजेन्द्र जीको त्यो मागलाई अस्वीकार र विरोध मात्र गर्न सकिन्छ । प्रधानमन्त्री श्री केपी ओलीले राजेन्द्र महतोले सञ्चालन गरिरहेको मुक्ति आन्दोलनका सम्बन्धमा अनभिज्ञता प्रकट गरेको सुन्दा आश्चार्य चकित भएको छु ।’