मुम्बई– बलिउड अभिनेता शाहरुख खान भारतका सबैभन्दा धनी अभिनेतामध्ये एक हुन् । हालैमात्र उनले आफ्नो फिल्म ‘पठान’का लागि सय करोड पारिश्रमिकको माग गरेको समाचार सार्वजनिक भएको थियो ।

नवभारत टाइम्समा प्रकाशित समाचारअनुसार शाहरुखसँगै उनकी श्रीमति गौरी खान फिल्म निर्माता तथा डिजाइनर हुन् । उनी कमाइको मामलामा शाहरुखभन्दा कम छैन ।

शाहरुख र गौरी बलिउडको शक्तिशाली जोडीमा गनिन्छन् । दुवैको सन् १९९१ मा विवाह भएको हो । उनीहरुको आर्यन, सुहाना र अबराम गरी तीन सन्तान छन् ।

शाहरुख भारतको सबैभन्दा महंगो अभिनेता भए जस्तै श्रीमति गौरी भारतकै ठूलो इन्टेरियर डिजाइनर हुन् । उनले मुकेश अम्बानी, रोबर्टो काभाली र राल्फ लाउरेन जस्ता हस्तीको घर डिजाइन गरेकी छन् ।

गौरीको आफ्नो प्रोडक्सन हाउस रेड चिलीज इन्टरटेनमेन्ट छ । सन् २०१८ मा फच्र्युन म्यागाजिनले उनलाई ‘५० शक्तिशाली महिला’को सूचीमा राखेको थियो ।

शाहरुख र गौरीको वार्षिक आम्दानी करिब २ सय ५६ करोड नजिक छ । जहाँ शाहरुखको नेट वर्थ ५१ सय करोड छ भने गौरीको १६ सय करोड छ ।