काठमाडौँ– ‘खुकुरी म्युजिक नेशन’ प्रतियोगिताका टप १६ प्रतियोगीहरुको नाम घोषणा भएको छ । खुकुरीले नेपाली संगीतको विरासतलाई निरन्तरता प्रदान गर्न भर्चुअल ‘खुकुरी म्युजिक नेशन’ प्रतियोगिता आयोजना गरेको हो ।

यस प्रतियोगितामा सहभागीता जनाउन आवेदन दिएकाहरु मध्येबाट शीर्ष १६मा स्थान जमाउन सफल भएका प्रतियोगीहरुको नाम गत जनवरी १ तारिखमा खुकुरीको आधिकारिक युट्युब च्यानल र डिशहोममा प्रदर्शित भव्य एवं बृहत्तर अनलाइन कन्सर्टको दौरानमा सार्वजनिक गरिएको थियो ।

घोषित शीर्ष १६ प्रतियोगीहरु ऋनिश श्रेष्ठ, अन्जान रानाभाट, युनिक बज्राचार्य, किरण भुषाल, महेश चापागाईं, मोनिका राई, सन्देश गुरुङ्ग, सागर राई, सन्तोष घले, उमित श्रेष्ठ, सबिन मगर, राजु गुरुङ्ग, दर्शिका रेग्मी, कुसुम गिरी, अशिम थापा, र जिग्मे बाङचुक रहेका छन् । प्रतियोगिताको लागि नेपाल भित्र रहेका र नेपाल बाहिर बसेका नेपालीहरुले सहभागीता जनाएका थिए ।

शीर्ष १६ प्रतियोगीहरुको चयन विपुल क्षेत्री, समृद्धि राई र सबिन राई सहितको निर्णायक मण्डलले गरेको थियो । प्रतियोगितामा सहभागी हुन इच्छुक आवेदकहरुले प्रतियोगिताको लागि उनीहरुको आफ्नो सांगीतिक कभर भिडियो आधिकारिक वेबसाइट खुकुरी म्युजिक डट कममा अपलोड/सम्मिलित गराएका थिए ।

यस प्रतियोगिताको अर्को चरणमा श्रोताहरुले आफ्नो मनपर्ने कलाकारको लागि भोट गर्न सक्नेछन् । आफ्नो मनपर्ने प्रिय कलाकारलाई प्रशंसकहरुले खुकुरी म्युजिक डट कममा गएर भोट गर्न सक्नेछन् ।

यो भर्चुअल प्रतियोगिताले नेपाली संगीतका उदयमान प्रतिभाहरुलाई आफू स्वयम् र उनीहरुका प्रियजनहरुको समेत स्वास्थ्य सुरक्षा सुनिश्चित् गर्दै आफ्नै घरबाट आफ्नो सांगीतिक प्रतिभा प्रदर्शन गर्ने अवसर प्रदान गरेको छ ।