काठमाडौँ– ललितपुरको सानेपास्थित गुसिटोल राम मन्दिर नजिकै एक भारतीय नागरिक मृत अवस्थामा फेला परेका छन् ।

सोही स्थानको एउटा घरको फ्ल्याट भाडामा लिएर बस्दै आएका ५९ वर्षीय सत्यनारायण पारिकको शव उनकै फ्ल्याटमा फेला परेको प्रहरीले जनाएको छ । सत्यनारायणले न्युरोडस्थित एटलान्टिक कम्प्युटर प्रालिमा काम गर्ने गरेको खुलेको प्रहरीले जनाएको छ ।

प्रारम्भिक अनुसन्धानमा उनको हत्या भएको हुन सक्ने देखिएको ललितपुर प्रहरी प्रमुख एसएसपी किरण बज्राचार्यले जानकारी दिइन् । घटनास्थलमा हम्मर पनि भेटिएको र टाउकोमा चोट देखिएकाले हत्या गरिएको हुनसक्ने प्रहरीको अनुमान छ ।

मृतक पारिकको फ्ल्याटमा एक महिला काम गर्न आउने गरेकी थिइन् । ती महिला दिनदिनै आएर खाना बनाइदिएर जाने गरेकी थिइन् ।

शुक्रबार खाना खुवाएर फर्किएकी महिला शनिवार बिहान खाना बनाउन आउँदा ढोका बन्द थियो । भित्रबाट च्यानल गेट बन्द भएपछि उनले फोन गरेकी थिइन् । तर, फोन नउठेपछि फर्किएको बयान प्रहरीलाई दिएकी छन् ।

एसएसपी बज्राचार्यका अनुसार ती महिलाले आज बिहान पनि ढोका नखुलेपछि स्थानीयको सहयोगमा प्रहरीलाई खबर गरेको र प्रहरी गएर हेर्दा उनको शव घोप्टो परेको अवस्थामा फेला परेको थियो ।