मुम्बई–टेलिभिजन उद्योगकी प्रख्यात कमेडियन उपासना सिंहविरुद्ध प्रहरीले कोरोना भाइरस सम्बन्धी नियमको उल्लंघन गरेको आरोपमा उजुरी दर्ता गराएको छ ।

बलिउड लाइफमा प्रकाशित समाचारअनुसार पञ्जाबमा हालको समयमा पूर्ण लकडाउन गरिएको छ । लकडाउनको समयमा उपासना रुपनगरको मोरिण्डामा नयाँ फिल्मको सुटिङमा व्यस्त रहेको खबर प्रहरीमा पुगेपछि प्रहरीले सुटिङस्थलमा छापा मारेको थियो ।

प्रहरीले उपासनालाई कोरोना नियम उल्लंघन गरेकोमा कैयौं प्रश्न सोधेको थियो । तर उपासनाले कुनै प्रश्नको जवाफ दिन सकिनन् । यतिमात्र होइन, उपासनासँग सुटिङ अनुमति पत्र पनि थिएन ।

प्रहरीले सुटिङ लोकेसनको भिडियो बनाएर अभिनेत्रीविरुद्ध मुद्धा दर्ता गराएको हो । प्रहरीले एपेडेमिक डिसीज एक्ट र डिजास्टर मेनेजमेन्ट एक्टसहित कैयौं धाराको प्रयोग गरेर मुद्धा दर्ता गराएको छ ।

उपासनाअघि पञ्जाबी अभिनेता जिम्मी शेरगिल र गिप्पी ग्रेवालमाथि पनि प्रहरीले कोरोना नियम उल्लंघनको आरोपमा मुद्धा दर्ता गराएको थियो ।

उपासना पछिल्लोपटक पञ्जाबी फिल्म ‘नोकर वहुती दा’मा देखिएकी थिइन् ।