काठमाडौँ– महानगरीय ट्राफिक प्रहरी महाशाखाले चोरी भएका २७ वटा मोटरसाइकल दुई हप्तामै खोजतलास गरी सम्बन्धीत धनीलाई बुझाएको छ ।

उपत्यका र आसपासका विभिन्न स्थानबाट चोरी भएका मोटरसाइकलहरू बरामद गरी महाशाखाले बिहीबार एक कार्यक्रमबीच सम्बन्धित सवारी धनीलाई जिम्मा लगाएको हो ।

महाशाखाले सुराकी तथा विशेष सूचना संकलन मार्फत टोली परिचालन गरी ती मोटरसाईकल वरामद गर्न सफल भएको जनाएको छ ।

महाशाखाको पीडित सहायता ईकाइबाट सादा पोसाकमा खटिएको ट्राफिक टोलीले उपत्यकाको जोरपाटी, जगाती, काँडाघारी, माछापोखरी, गोकर्णेश्‍वर, नयाँबसपार्कका साथै उपत्यकासँग सिमाना जोडिएका नुवाकोट, धादिङ र मकवानपुर जिल्लाका विभिन्न स्थानहरुबाट उक्त मोटरसाईकलहरु बरामद गरेको एसएसपी जनक भट्टराईले जानकारी दिए ।

बिहीबारमात्रै करिव ८० लाख बढि मुल्य बराबरको विभिन्न कम्पनीका मोटरसाईकलहरु सम्बन्धित धनीलाई बुझाएको छ भने यस वर्षमा करिब १६ करोड बढि मुल्य पर्ने मोटरसाईकलहरु नियन्त्रणमा लिएको महाशाखाले जनाएको छ ।