काठमाडौँ – वाणिज्य, आपूर्ति तथा उपभोक्ता संरक्षण विभागले काठमाडौँ महानगरपालिका –१६, बालाजुस्थित राजेश हार्डवेयरमा शिलबन्दी गरेको छ ।

उपभोक्ताको गुनासोका आधारमा विभागले गरेको प्रारम्भिक अध्ययनमा उक्त हार्डवेयरले बिलमा उल्लेखित परिणाम भन्दा कम डण्डीलगायत फलामजन्य सामग्रीको बिक्री गरेको भेटिएको हुँदा ती वस्तु नियन्त्रणमा लिई शिलबन्द गरी बिक्री वितरणमा रोक लगाइएको विभागका प्रवक्ता निर्देशक शिवराज सेडाईले जानकारी दिए ।

विभागले २४ घण्टाभित्र कागजातसहित विभागमा उपस्थित हुन हार्डवेयरका सञ्चालक सागरम अग्रवाललाई निर्देशन दिएको छ ।

राजेश हार्डवेयरको बालाजु शाखाका प्रमुख कमल शर्मालाई भने प्रहरीले पक्राउ गरेको छ । थप अनुसन्धानपछि आवश्यक कारबाही प्रक्रिया अगाडि बढाइने निर्देशक सेडाईले बताए ।