काठमाडौं– सरकार र नेत्रविक्रम चन्द (विप्लव)ले नेतृत्व गरेको नेपाल नेकपाबीच दोस्रो चरणको वार्ता भएको छ । सरकार र विप्लव समूहबीच एकैदिन दुईपटक वार्ता भएको हो ।

प्रधानमन्त्री निवास बालुवाटारमा आज बिहान कडा सुरक्षाबीच वार्ता भएको थियो । त्यसपछि खाना खानका लागि केही समय रोकिएको वार्ता अहिले अपरान्ह पुनः शुरु भएको हो ।

सरकारी वार्ता टोलीका सदस्य तथा प्रधानमन्त्रीका परराष्ट्र मामिला सल्लाहकार राजन भट्टराईले दोस्रो चरणको वार्ता बुधबार साँझ भएको जानकारी दिए । उनले वार्ता विषयकेन्द्रित रहेको समेत बताए ।

उनका अनुसार दुवै पक्ष समान धारणा नजिक पुगेको र वार्ता छिट्टै सकारात्मक निष्कर्षमा अपेक्षा गरिएको छ ।

सरकारी वार्ता टोलीमा गृहमन्त्री रामबहादुर थापा ‘बादल’ र भट्टराई छन् भने विप्लव समूहबाट खड्गबहादुर विश्वकर्मा र उदय चलाउने छन् । दुवै पक्षले मंगलबार वार्ता टोली गठन गरेका थिए ।