काठमाडौँ– विवेकशील साझा पार्टीका संयोजक मिलन पाण्डेले आफ्नै पार्टीका अध्यक्ष रवीन्द्र मिश्रले आफूसँगै अरुलाई पनि तर्साउने काम गरेको आरोप लगाएका छन् ।

मिश्रले हालै सार्वजनिक गरेको संघीयता खारेजी र धर्मनिरपेक्षताबारेको दस्तावेजविरुद्ध कटाक्ष गर्दै संयोजक पाण्डेले भविष्य देखाउन नसक्नेले भूत देख्ने बताएका छन् ।

आज उनले सामाजिक सञ्जालमार्फत मिश्रको विचारविरुद्ध अर्को प्रहार गरेका हुन् ।

नाम नलिईकन उनले अध्यक्ष मिश्रको विचारलाई ‘भूतको त्रास’ को संज्ञा दिएका छन् । आफ्नो पार्टी भूतको त्रासको राजनीति होइन, भविष्यको आशा देखाउने राजनीति गर्ने पार्टी भएको उनको भनाइ छ।

‘नयाँ बिहानी, नयाँ संकल्प: जसले भविष्य देखाउन सक्दैन । उसले विगतको भूत देख्छ । आफू तर्सिन्छ। अरूलाई तर्साउँछ,’ संयोजक पाण्डेले लेखेका छन्, ‘प्रिय साथीहरू, वैकल्पिक राजनीति भूतको त्रासको राजनीति होइन। यो त भविष्यको आशा देखाउने राजनीति हो। यो त सम्भावनाको राजनीति हो ।’