जनकपुरधाम– प्रदेश २ सरकारले नीति तथा योजना आयोगमा दुई जना सदस्य नियुक्त गरेको छ ।

प्रदेश सरकारले सिरहाको मिर्चैया नगरपालिका २ का डा. बैद्यनाथ महतो र मिथिला नगरपालिका ६ धनुषाका प्रमिला कुमारी सिंहलाई नीति तथा योजना आयोगको सदस्यमा नियुक्त गरेको हो ।

नव नियुक्त दुबै सदस्यहरुलाई मुख्यमन्त्री लालबाबु राउतले आजै नियुक्त पत्र हस्तान्तरण गरे ।

मुख्यमन्त्री राउत अध्यक्ष रहेको आयोगमा डा. भोगेन्द्र झा उपाध्यक्ष रहेका छन् । आयोगमा एक महिला सदस्यसहित बढीमा ६ सदस्य र आर्थिक मामिला तथा योजना मन्त्रालयको सचिव सदस्य रहनेगरी आठ सदस्य आयोग गठन हुने व्यवस्था रहेको छ ।

आर्थिक वर्ष ०७४÷७५ मा एक उपाध्यक्ष र एक सदस्य नियुक्त भएको थियो । गत आर्थिक वर्ष ०७५÷७६ मा तीन सदस्य थप भई पदेन समेत ७ सदस्यीय आयोग गठन भएको थियो ।

तत्कालीन उपाध्यक्ष रहेको डा. हरिवंश झासहित सबै सदस्यहरुलाई हटाएपछि उपाध्यक्षमा डा. भोगेन्द्र झालाई नियुक्त गरिए पनि सदस्य पद रिक्त थियो ।