काठमाडौँ– विवादित दक्षिण चीन सागरमा चिनियाँ गतिविधिको भियतनामले निन्दा गरेको छ ।

विवादित दक्षिण चीन सागरस्थित ह्विटसन रिफ नजिकै चीनले माछा मार्ने नौसैन्य विमानहरु लामो समय यता राखेको भन्दै भियतनामले चिनियाँ गतिविधिको आलोचना गरेको हो ।

भियतनामको विदेश मामिला मन्त्रालयकी प्रवत्ताले आफ्नो क्षेत्राधिकारमा चीनले विभिन्न गतिविधि गरेर भियतनामको सार्वभौमिकता उल्लंघन गरेको टिप्पणी गरेकी छन् ।

यसअघि, फिलिपिन्सले पनि आफ्नो क्षेत्राधिकार ह्विटसन रिफमा चीनले अवैध रुपमा माछा मारेको भन्दै तत्काल सो क्षेत्र छोड्न चेतावनी दिएको थियो । भियतनाम र फिलिपिन्सको आलोचना पछि चीनले सो क्षेत्र तत्काल छोड्न सक्ने तर पुनः फर्किने र उपस्थिति देखाउन सक्ने सिंगापुरस्थित नानयाङ टेक्नोलोजिकल युनिभर्सिटिका समुद्री सुरक्षा अनुसन्धानकर्ता कोलिनकोले विश्लेषण गरेका छन् ।

विवादित दक्षिण चीन सागरमा चीन, ताइवान, भियतनाम, फिलिपिन्स, ब्रुनइ र मलेसिया लगायत मुलुकहरुले आफ्नो क्षेत्र दाबी गर्दै आएका छन् । स्रोत : भ्वाइस अफ अमेरिका