काठमाडौँ- नेपाली राष्ट्रिय क्रिकेट टोलीका अलराउण्डर करण केसी आबद्ध पुने डेभिल्सले तेस्रो हार व्यहोरेको छ ।

आबुधाबी जारी टी-१० लिगमा सोमबार भएको खेलमा पुने बंगला टाइगर्ससँग ८ विकेटले पराजित भएको हो ।

पुनेले दिएको १ सय १६ रनको लक्ष्य बंगलाले ८ ओभर ५ बलमा २ विकेट गुमाएर पुरा गर्‍यो ।

बंगलाको जितमा टम मोरेसले अविजित ३८ रन जोडे । यस्तै आन्द्रे फ्लेट्चर र चिराग सुरीले ३०-३० रन बनाए । पुनेका मोहमद आमिरले १ विकेट लिए । करण एक ओभर बलिङ गर्दै १७ रन दिए । उनले विकेट लिन सकेनन् ।

यसअघि पहिले ब्याटिङ गरेको पुनेले १० ओभरमा ३ विकेट गुमाएर १ सय १५ रन बनाएको थियो ।

पुनेका टम काडमोरले ४८ रन बनाए । यस्तै एलेक्स डेभिसले अविजित ४१ रन बनाए ।

हारसँगै समूह ‘बी’ को पुछारमा रहेको पुनेको ४ खेलमा २ अंक मात्र छ ।