काठमाडौँ– के तपाई रातको समयमा तिब्र गतिमा सवारी साधान चलाउनुहुन्छ ? होसियार ट्राफिक प्रहरीको कारबाहीमा परिएला नि !

महानगरीय ट्राफिक प्रहरी महाशाखाले रातको समयमा तिब्र गतिका कारणले हुने सडक दुर्घटना न्यूनिकरण गर्न ‘नाइट भिजन लेजर स्पीड गन’ सहितको चेकिङ्ग सुरु गरेको छ ।

बिशेषगरि कोटेश्वर–सूर्यबिनायक सडक, रिङ्गरोड र चौडा सडकहरुमा तिब्र गतिमा सवारी चलाई दुर्घटना हुने गरेको तथ्यलाई मध्यनजर गर्दै ट्राफिक प्रहरीले दिनको समयमा लेजर गनको प्रयोग गरी तिब्र गति नियन्त्रणको अभियान सुरु गर्दै आएको छ ।

दैनिक रुपमा दिउँसो हुने चेकिङ्गमा तिब्रगतिमा सवारी चलाउने ३५–४० जना चालकहरुलाई लेजर गन मार्फत कारबाही गर्दै आएकोमा, अब भने रातको समयमा समेत ओभर स्पिड चेकिङ्ग गरी गति नियन्त्रण गर्नेअभियान पहिलो पटक सुरु गरेको महाशाखाले जनाएको छ ।

तिब्र गतिमा सवारी चलाउने चालकहरुलाई कारबाहीको साथै सचेत गराएको महाशाखा प्रमुख एसएसपी जनक भट्टराईले जानकारी दिए ।

उनले बुधबार रातिदेखी नाइट भिजन लेजर स्पीड गनको प्रयोग सुरु गरेको र यसले तिब्र गति नियन्त्रणका साथै रातको समयमा हुने दुर्घटना न्यूनीकरणमा

उल्लेख्य भूमिका निर्बाह गर्ने बिश्वास व्यक्त गरे ।

स्पीड गन प्रयोगमा ल्याएकै दिन सातदोबाटो ग्वार्को क्षेत्रमा ओभर स्पीडमा सवारी चलाउने धेरै सवारी चालकहरुलाई नियन्त्रणमा लिई सचेत गराएको र नाईट स्पीड चेकिङ्गलाई कडाईका साथ लगिने समेत महाशाखाले जानकारी दिएको छ ।

तिब्र गतिमा सवारी साधन चलाउँदा आफुलाई मात्र नभइ अन्य सडक प्रयोगकर्तालाई समेत जोखिम हुने र दुर्घटनाको सम्भावना अत्यधिक हुने भएकोले तिब्र गति र लापरबाहीका साथ सवारी नचलाउन सवारी चालकहरुलाई ट्राफिक प्रहरी महाशाखाले बिशेष अनुरोध समेत गरेको छ ।