काठमाडौँ– जनता समाजवादी पार्टी नेपाल (जसपा) का एक अध्यक्ष उपेन्द्र यादव पक्षले अर्का अध्यक्ष महन्थ ठाकुरसहित चार नेतालाई निष्कासन गरिएको पत्र निर्वाचन आयोगमा पठाएको छ । चार नेतामाथिको कारबाहीसँगै जसपा विभाजनले ‌औपचारिकतासमेत पाएको छ ।

यादवपक्षीय जसपाको कार्यकारिणी समिति बैठकले आजै ठाकुरसहित राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई पार्टीको साधारण सदस्यबाट निष्कासन गर्ने निर्णय गरेको थियो ।

सो सम्बन्धी निर्णयको जानकारी तत्कालै यादवले निर्वाचन आयोगलाई गराई दलको दर्ता किताबबाट नाम हटाउन अनुरोध गरेका छन् । आयोगमा दुवै अध्यक्षको नाम दर्ता छ ।

यादवले चार नेतालाई निष्कासन गरिएको जानकारी गराउँदै आयोगलाई लेखेको पत्रमा भनिएको छ, ‘राजनीतिक दल सम्बन्धी ऐन २०७३ को दफा ५१ को १ २ र ३ बमोजिम हाम्रो दलको दर्ता किताबबाट नाम हटाई अद्यावधिक गर्न हुन अनुरोध गरिन्छ । ‘

जसपा विवाद पनि अब तत्कालीन नेकपाको जस्तै निर्वाचन आयोगमा पुगेको छ । महन्थ ठाकुर पक्षले पनि लगत्तै यादवमाथि निष्कासनको कारवाहीको निर्णय गरेको छ ।

हेर्नुहोस् पत्र