मुम्बई– बलिउड अभिनेत्री प्रियंका चोपडा हलिउड पुगे पनि उनको अभिनय मनपराउने दर्शक अझै पनि भारतमा छन् । उनले आफ्नो लामो अभिनय करियरमा कैयौं सम्झनलायक भूमिका निभाएकी छन् । उनले ग्ल्यामर युवतीदेखि लिएर चरित्र भूमिकासमेत निर्वाह गरिसकेकी छन् ।

उनको अभिनयबाट प्रभावित लेखक मनोज मुंतशिरले आफूले निर्माण गर्न लागेको रानी अहिल्याबाई होल्करको कथामा आधारित फिल्ममा प्रियंकालाई लिने तयारी भइरहेको बताएका छन् । उनले रानी अहिल्याबाईको भूमिकाका लागि चाहिने इच्छा, संकल्प र आत्मविश्वास प्रियंकामा रहेको दाबी गरेका छन् ।

बलिउड लाइफका अनुसार उनले रानी अहिल्याबाईको आत्मकथाका बारेमा प्रियंकासँग कुराकानी गरेका छैनन् । किनकी प्रियंका हालका दिनमा अमेरिकामा छिन् । उनी भारत आउनासाथ कुरा गर्ने मनोजको भनाइ छ ।

यो फिल्म सन् २०२१ को अन्त्यसम्ममा फ्लोरमा जानेछ । मनोज हालका दिनमा आफ्नो टिमको साथ फिल्मको कथा र संवाद लेखिरहेका छन् । फिल्मको बाँकी स्टारकास्टको बारेमा केही खुलाइएको छैन ।

मनोज बलिउडका नाम चलेका लेखक हुन् । उनले ‘बाहुबली’ सिरिजको हिन्दी संवाद र गीत लेखेका छन् ।