मुम्बई– बलिउड अभिनेता रणधीर कपूर केही समयदेखि चर्चामा छन् । ७४ वर्षे यी अभिनेतालाई केही दिन अघि कोरोना संक्रमण भएपछि उनलाई आईसीयूमा भर्ना गरिएको छ । अहिले उनी अस्पतालमै उपचाररत छन् ।

बलिउड लाइफमा प्रकाशित समाचारअनुसार उनको स्वास्थ्यमा केही सुधार हुँदै आएको छ । यहीबीचमा उनले आफ्नो खानदानी आरके हाउस बेच्ने योजना बनाएका छन् ।

पैतृक घर बेचेपछि उनी आफ्नो बान्द्रास्थित घरमा सर्ने योजना बनाउदैछन् । उनको बान्द्रास्थित घर निर्माण भइसकेर तयारी अवस्थामा छन् । कोरोना मामलामा आएको तिब्रतासँगै उनले यो निर्णय लिएका हुन् ।

‘राजीव कपूरको निधन पछि आरके हाउसमा बस्ने मन छैन । मलाई एक्लोपनको महशुस भइरहेको छ । अब म आफ्नो परिवारसँग नजिक रहन चाहन्छु । बान्द्रा सरेपछि म बबीता, करीना कपूर र करिश्मा कपूरसँग नजिक हुनेछु’, रणधीरले एक अन्तरवार्तामा भनेका छन् ।

गत वर्ष रणधीरले आफ्नो भाइ राजीव र ऋषि कपुर गुमाए । भाइ राजीवको मृत्युपछि रणधीर घरको सम्पत्ति बेच्ने योजना बनाइरहेका छन् ।

यो समयमा रणधीरको दिवंगत भाइ राजीवको सम्पत्तिलाई लिएर विवाद चलिरहेको छ । राजीवको कोही सन्तान छैन । सन्तान नभएका कारण यो मामला अदालत पुगेको छ । सोमबारमात्रै बम्बई हाइकोर्टले रणधीर र रीमा जैनसँग सम्पत्तिको अन्डरटेकिङ मागेको छ ।