काठमाडौँ– काठमाडौं जिल्ला सहकारी र हेराल्ड मिडिया हाउसको मुख्य आयोजनामा आगामी चैत २८ गते दशरथ रंगशालामा कोभिड कप फुटबल प्रतियोगिता हुने भएको छ ।

उक्त प्रतियोगिताको उद्घाटन भने प्रधानमन्त्री केपी शर्मा ओलीले गर्ने भएका छन् । आयोजक टिमले बिहीबार काठमाडौंमा पत्रकार सम्मेलन गरेर प्रतियोगिताको विषयमा जानकारी दिएको थियो ।

विश्वलाई सन्देश दिने उद्देश्यले आफूहरुले उक्त प्रतियोगिताको आयोजना गरेको आयोजक टिमको भनाइ छ ।

आयोजकका अनुसार प्रतियोगितामा विभिन्न दश टिमले सहभागी जनाउनेछन् । कलाकारहरुको तर्फबाट भाग लिने टिमको नेतृत्व (कप्तान) नायक धीरेन शाक्यले गर्ने र लोकदोहोरीबाट भाग लिने टिमको नेतृत्व गायक बद्री पंगेनी, हाँस्यकलाकारबाट ईन्द्र दोङ खम्बे, काठमाडौं जिल्ला सहकारी संघबाट अध्यक्ष ज्ञानबहादुर तामाङले गर्ने बताइएको छ ।

‘कोभिडबाट थलिएका हामी फेरि उठ्नुछ’ भन्ने नाराका साथ प्रतियोगिता विशुद्ध मनोरञ्जनका लागि मात्र हुने पनि आयोगक टिमले जनाएको छ ।

कार्यक्रममा मिडिया हाउसका कार्यकारी निर्देशक समिर लामाले विश्व नै कोभिडबाट प्रभावित भएको उल्लेख गर्दै नेपालले भने कोभिडबाट कम क्षति व्यहोरेको भन्दै कोभिड नियन्त्रणमा नेपालको अवस्था सन्तोषजनक भएको बताए । उनले भने,‘विश्वले नै कोभिडको मार भोगिरहेको छ ।’