काठमाडौं– स्पानिस क्लब बार्सिलोनाका पूर्वअध्यक्ष जोसेफ मारिया बार्तामेउलाई स्पानिस प्रहरीले पक्राउ गरेको छ । उनीसहित तीन जनालाई सोमबार पक्राउ गरेको अमेरिकी समाचार संस्था डेली मेलले जनाएको छ ।

डेलीमेलका अनुसार बार्तामेउमाथि उनी क्लबको अध्यक्ष रहँदा पूर्वखेलाडीलाई अभियोग लगाउने ‘बार्सागेट’ नामक अभियान चलाएको आरोप छ ।

समाचारमा जनाइए अनुसार बार्सिलोनाका सीईओ ओस्कार ग्राउ र हेड अफ लेगल सर्भिसका रोमन गोमेज पोन्टी पनि पक्राउ परेको डेली मेलले जनाएको छ ।

बार्तामेउले क्लबका वर्तमान र पूर्वखेलाडीको विरुद्धमा धब्बा लाग्ने खालको अभियान चलाएको स्पानिस मिडियाले जनाएका छन् । यसअघि लियोनल मेसीसँगको विवादपछि बोर्ड निर्देशकसहहित बार्तामेउले पदबाट राजीनामा दिएका थिए ।