काठमाडौँ– सञ्चार तथा सूचना प्रविधि मन्त्री पार्वत गुरुङले हालै विश्वकै दोस्रो अग्लो शिखर माउन्ट केटूको सफलतापूर्वक आरोहण गरी कीर्तिमानी राखेको टोलीलाई सम्मान गरेका छन् ।

सोमबार सञ्चार तथा सूचना प्रविधि मन्त्रालय, गौरीशंकर गाउँपालिका, दोलखा र गौरीशंकर गाउँपालिका कार्यालय वडा नं. ९ को कार्यालयले संयुक्त रुपमा आरोहण टोलीलाई सम्मान गरेको हो ।

विश्वको दोस्रो सर्वोच्व शिखरमा हिउँदको मौसममा पहिलोपटक सफल आरोहण गरेर किर्तिमानी कायम गरेको खुसियालीमा सञ्चारमन्त्री गुरुङले सम्मान गरे ।

सो अवसरमा मन्त्री गुरुङले विश्वसामू नेपालको नाम राखेकोमा सारा नेपाली खुशी भएको बताए ।

त्यस्तै उनले मुलुकलाई समृद्ध बनाउनका लागि आफूहरु प्रयत्नशिल रहेको धारणा राखे ।

यस्तै केटु हिमाल आरोही टिमका सदस्य मिङ्मा शेपाले नेपालको नाम विश्वमा चिनाउने उद्देश्यका साथ हिमाल आरोहणमा गएको बताए ।

नेपाली आरोही टोलीले माघ ३ गते दिउँसो नेपाली समयअनुसार सवा ५ बजे विश्वकै दोस्रो अग्लो केटू हिमाल (८,६११ मिटर) मा पाइला राख्न सफल भएको थियो ।