काठमाडौं – अभिनेत्री करिश्मा मानन्धरले छोरी कविता मानन्धर र अभिनेता सरोज खनाललाई प्रमुख भूमिकामा लिएर फिल्म ‘वनबास’ बनाउने भएकी छन् ।

उनले सामाजिक सन्जाल फेसबुकमार्फत ‘वनबास’को तस्बिर राख्दै ‘कथा परिवारको, कथा सम्बन्धको– ‘वनबास’ लेखेकी छन् । करिश्माले निर्माण गरेको फिल्म ‘फागू’ पाँच वर्ष अघि रिलिज भएको थियो ।

करिश्माकी छोरी कविताले यसअघि फिल्म ‘एउटा यस्तो प्रेम कहानी’बाट अभिनयमा डेब्यू गरे पनि उनको डेब्यू सफल हुन सकेन । करिश्माले होम प्रोडक्सनमार्फत निर्माण गर्न लागेको फिल्ममा सुशील क्षेत्रीको निर्देशन रहनेछ ।

‘यो राम वनबास गएको वनबास होइन । तर कथाले धेरै मात्रामा त्यस्तै किसिमको व्याख्या गर्छ । अहिले बनाइरहेको व्यावसायिक फिल्म भन्दा फरक हो । यसले बाबुछोरीको सम्बन्धको कथा बोल्छ’, करिश्माले भनिन्, ‘अहिले फरक कथाका फिल्म बनिरहँदा त्यसलाई नै हामीले पछ्याएका हौँ । झरीको मौसममा यसको छायांकन गर्छौ । फिल्मको थिम अनुसार नै वैशाख, जेठ, असारतिर सुटिङ गर्ने योजना बनाएका छौं ।’

करिश्मा फिल्ममा कलाकार धेरै नभएकाले पनि काम छिटो सकिनेमा विश्वस्त देखिइन् । करिश्माले सानो बजेटमा दर्शकलाई राम्रो फिल्म दिन आफू तयारी अवस्थामा रहेको बताइन् ।