काठमाडौं– राजश्व अनुसन्धान विभागले मूल्य अभिवृद्धि कर (भ्याट) को नक्कली बिजक जारी गरी ठगी गरेको आरोपमा २८ जनाविरुद्ध उच्च अदालत पाटनमा मुद्दा दायर गरेको छ।

विभागले एक अर्ब ३२ करोड ४६ लाख १२ हजार ५६५ बराबरको झुट्टा बिजक जारी गरेको अभियोगमा काठमाडौँ सीतापाइलास्थित पद्म कोलनीमा बस्‍ने रामकिशोर प्रसादसहित २८ जनाविरुद्ध शुक्रबार मुद्दा दायर गरेको हो ।

प्रसादको कम्पनी मोहन ट्रेड इन्टरनेशनलसहित अन्य २६ व्यावसायिक फर्मले एक आपसमा मिलेर आर्थिक अवस्था कमजोर भएका मजदुरलगायतको नाममा फर्म दर्ता गरी सञ्चालन गरेको खुलेको छ। उनीहरुकै नाममा गलत प्रयोजनका लागि बैंक खातासमेत खोलेको भेटिएको छ।

आर्थिक वर्ष २०७१/७२ देखि २०७४/७५ सम्म उनीहरुले नक्कली बिक्री बिजक जारी गरी भ्याट छली गरेको पाइएको विभागले जनाएको छ ।

विभागका अनुसार भ्याटतर्फ ४३ करोड ८१ लाख ८० हजार ३७८, आयकरतर्फ ८६ करोड ५६ लाख एक हजार र लाभांश करतर्फ दुई करोड आठ लाख ३० हजार ४०२ बराबरको राजश्व चुहावट गरेको भेटिएको छ।