काठमाडौं- मदन भण्डारी स्वास्थ्य विज्ञान प्रतिष्ठानको उपकुलपतिमा नियुक्त भएका प्रा डा विश्वराज जोशीले आज मुख्यमन्त्री डोरमणि पौडेलसमक्ष पद तथा गोपनीयताको शपथ लिएका छन् ।

सो अवसरमा नवनियुक्त उपकुलपति प्रा डा जोशीले हेटौँडा अस्पताल परिसरमा स्थापना हुने मदन भण्डारी स्वास्थ्य विज्ञान प्रतिस्ठानलाई राष्ट्रिय, अन्तरराष्ट्रियस्तरमा मान्यता प्राप्त हुने दक्ष चिकित्सक तथा स्वास्थ्य प्राविधिक उत्पादन गर्ने स्वास्थ्य अनुसन्धान केन्द्र बनाउने बताए ।

उनले मेडिकल इञ्जिनीयरिङ विषय अध्यापन गराउने र स्वास्थ्य उपकरण मर्मत गर्ने इञ्जिनीयर उत्पादन गर्ने बताउँदै हाल हेटौँडा अस्पताल १०० श्ययामा सञ्चालन भइरहेको र थप भवन निर्माण सम्पन्नपछि ३०० श्यया पुर्‍याएर मेडिकल कलेजका रुपमा सञ्चालन गर्ने योजना रहेको जानकारी दिए ।

सो अवसरमा चिकित्सा क्षेत्रका विज्ञले प्रतिष्ठान स्थापना तथा सञ्चालन गर्न विभिन्न सल्लाह, सुझावसहित सहकार्य गर्ने बताए ।