चितवन- जिल्ला अदालत चितवनले विप्लव नेतृत्वको नेकपाका नेता अनिल शर्मा ‘विरही’लाई साधारण तारेखमा रिहा गर्न आदेश जारी गरेको छ ।

न्यायाधीश हेमन्त रावलको इजलाशले शर्मालाई तत्काल हिरासतमुक्त गरी चिकित्सकको परामर्शविना फेरि पक्राउ नगर्न समेत आदेश जारी गरेको हो ।

गत २३ वैशाखमा पक्राउ परेका नेता शर्मालाई रिहा गर्न आदेश दिँदै अदालतले राज्यविरुद्धको अपराध हुने कुनै प्रमाण नदेखिएको भन्दै चिकित्सकको परामर्शविना अन्यत्र नलैजान र धरपकड समेत नगर्न भनिएको छ ।

प्रहरीले शर्माविरुद्ध अर्को जिल्लामा समेत मुद्दा दायर गरेको देखिएको भन्दै जिल्ला अदालत चितवनले शर्माका साथमा भेटिएको भनिएको विप्लव नेतृत्वको नेकपाको पर्चाकै आधारमा राज्यद्रोह भएको निष्कर्ष निकाल्न नमिल्ने आदेशमा भनिएको छ ।

कुनै पनि व्यक्तिलाई राजनीतिक दलको कार्यकर्ता हुन पाउने संवैधानिक व्यवस्था रहेको र विप्लव नेतृत्वको नेकपाको ध्वंशात्मक गतिविधिमाथि मात्रै सरकारले प्रतिबन्ध लगाएको तर राजनीतक दलमाथि प्रतिबन्ध लगाउने व्यवस्था संविधानले समेत परिकल्पना नगरेको आदेशमा भनिएको छ ।

आदेशमा के भनिएको छ ?