काठमाडौं– नेपाल राष्ट्र बैंकले फेसबुक, ट्विटर र युट्युवमा विज्ञापन गरेर विदेशमा भुक्तानी गर्न रोक लगाएको छ ।

केन्द्रीय बैकले आज एक सूचना जारी गर्दै सामाजिक सञ्जालमार्फत् विज्ञापनमार्फत् अनौपचारिक माध्यमबाट भुक्तानी गर्नु गैरकानूनी रहेको भन्दै त्यस्तो विज्ञापन गर्ने काम बन्द गर्न आह्वान गरेको छ ।

राष्ट्र बैकले यस्तो कारोवारबाट विदेशी मुद्रा अपचलन हुने भन्दै विदेशी विनिमय (नियमित) गर्ने ऐन २०१९ अनुसार कारबाही गर्ने समेत जनाएको छ ।
विदेशी विनिमय(नियमित गर्ने) ऐन २०१९ को दफा ९ अनुसार नेपाल बाहिर बसोबास गर्ने कुनै पनि व्यक्तिलाई कुनै तरिकारले कुनै किसिमको भुक्तानी दिन नहुने उल्लेख गरिएको छ ।

ऐनकै दफा १७ मा बैंकले तोकेको कुनै पनि प्रक्रियाविपरित कुनै पनि व्यक्तिले कुनै काम गरेमा सो काम गरेवापत् कसुरसँग सम्बन्धित विदेशी विनियम जफत गरी त्यस्तो व्यक्तिलाई बिगोबमोजिम जरिवानादेखि ३ गुणासम्म जरिवाना हुनेछ ।

तर त्यस्तो कसुरसँग सम्बन्धित बिदेशी बिनिमय जफत गर्न नमिल्ने अबस्थाको कसुरहरुका सम्बन्धमा सो कसुरसँग सम्बन्धित विदेशी बिनियमको विगो कायम गरी त्यसरी काम हुन आएको बिगो बमोजिमको ३ गुणासम्म जरिवाना थप सजाय हुनेछ ।

ऐनकै दण्ड सजायसम्बन्धी व्यवस्थामा भनिएको छ, उपदफा १ बमोजिम बिगो कायम गर्दा रकम खुल्न वा खुलाउन नसकिने अबस्था आइपरेमा कसुरको मात्रा हेरी २ लाख रुपैयाँसम्म जरिवाना हुनेछ ।