काठमाडौं – आगामी कात्तिक ७ गतेदेखि टेलिभिजन प्रशारणमा क्लिनफिड लागु हुने भएको छ । प्रधानमन्त्री केपी शर्मा ओलीले आउँदो कार्तिक ७ गतेदेखि क्लिन फिड लागू हुने बताएको उनका प्रेस सल्लाहकार सूर्य थापाले जानकारी दिए ।

मिडिया एलाइन्सका पदाधिकारीसँगको भेटमा कानूनबमोजिम विज्ञापनरहित प्रशारण सेवा (क्लिनफिड) लागू हुने थापाले बताएका हुन् ।

नवगठित मिडिया एलायन्स नेपालका अध्यक्ष भाष्करराज राजकर्णिकारले नेतृत्व गरेको पदाधिकारी र सदस्यहरूको टिमलाई बुधबार साँझ बालुवाटारमा बधाई ज्ञापन गर्दै प्रधानमन्त्री ओलीले बताएका हुन् ।

प्रम ओलीले पत्रकारहरूको भौतिक सुरक्षाको सरकारले शतप्रतिशत प्रत्याभूति गर्ने र अन्य क्षेत्रहरूमा संभव सहयोग, सुरक्षा र संरक्षण हुने पनि बताए ।

हालै मिडिया उद्योगीहरुको संस्था विभाजन भएको थियो । कर्णिकारको नेतृत्वमा मिडिया एलाइन्स नामको मिडिया उद्योगीहरुको संस्थापना स्थापना गरिएको छ। मिडिया सोसाइटीबाट विभाजन भएर उद्योगीहरुले नयाँ संस्था दर्ता गरेको घोषणा गरेका हुन् ।