काठमाडौं- त्रिवि शिक्षण अस्पताल महाराजगञ्ज (टिचिङ)मा उपचाररत एकजना शिशुमा कोरोना संक्रमण पुष्टि भएको छ ।

अस्पतालका कोभिड व्यवस्थापन समितिका संयोजक डाक्टर सन्त कुमार दासका अनुसार ४५ दिनको शिशुमा कोरोना संक्रमण पुष्टि भएको हो ।

म्याग्दी घर भएका ती शिशुमा घाँटीमा समस्या देखिएपछि आइसोलेसन वार्डमा नै राखेर सोमबार शल्यक्रिया समेत गरिएको डा दासले बताए ।

‘हाम्रो अस्पतालमा उपचारत ४५ दिनका शिशुमा कोरोना पोजेटिभ आएको छ । दुइ हप्ताअगाडी अस्पतालमा भर्ना भएका थिए,’ डा दासले खबरहबसँग भने, ‘शिशुको घाँटीमा समस्या भएर शल्यक्रिया गर्नुपरेपछि कोरोना परीक्षणका लागि नमुना लिइएको थियो । अवस्था जटिल भएपछि हिजो आइसोलेसनमै राखेर शल्यक्रिया गरियो। ती शिशुको आज बिहान कोरोनाको रिपोर्ट पाजेटिभ आयो ।”

शिशुलाई अहिले आइसोलेसनमै राखिएको डा दासले जानकारी दिए ।

डा दासका अनुसार टिचिङ अस्पतालमा हाल ५ जना कोरोना पोजेटिभ बिरामीहरु उपचार छन् ।