गुलरीया– अवैध लागू औषध ब्राउन सुगरसहित बर्दिया प्रहरीले ४ जनालाई पक्राउ गरेको छ ।

बर्दियाको गुलरिया नगरपालिका-६ बाट अवैध लागू औषध ब्राउनसुगर ४६ ग्राम ४ सय ३० मिलीग्राम सहित ४ जनालाई बुधबार साँझ प्रहरीले पक्राउ गरेको हो ।

पक्राउ पर्नेहरुमा कैलाली जिल्लाको टीकापुर नगरपालिका-१ घर भएका २८ वर्षीय राजन रावल, कैलालीकै लम्की चुवा नगरपालिका-५ घर भएका २९ वर्षीय रोशन कडायत, दैलेखको दुल्लु नगरपालिका-७ घर भएका २७ वर्षीय आकाश शाह र कैलाली टीकापुर नगरपालिका-९ घर भएका ३३ वर्षीय रमेश न्यौपाने रहेका छन् ।

उनीहरुले बा.१२ च ६२९९ नम्बरको गाडीमा लागूऔषध ब्राउनसगुरको कारोबार तथा ओसार पसार गरिरहेको भन्ने सूचनाको आधारमा जिल्ला प्रहरी कार्यालय बर्दियाबाट खटिएको प्रहरीले उक्त गाडी नियन्त्रणमा लिई खानतलासी गरेको थियो ।

खानतलासी गर्दा गाडीको स्टेरिङभित्र कालो रङको प्लाष्टिकमा पोको पारी लुकाई राखिएको अवस्थामा उक्त परिमाणको लागूऔषध फेला पारी उनीहरुलाई पक्राउ गरिएको बर्दिया प्रहरीले जानकारी दिएको छ ।